СВР Битола до Основното јавно обвинителство Битола поднесе кривична пријава против А.В.(20) од Кичево, поради постоење на основано сомнение за сторено кривично дело „предизвикување општа опасност“, казниво по член 288 од Кривичниот законик.
Имено, на 11.07.2023, во периодот од 19.00 до 19.20 часот, во Казнено-поправната установа Затвор Битола, пријавениот предизвикал пожар во ќелијата каде издржувал казна притвор, при што просторијата била опожарена, а биле оштетени и други простории во притворското одделение.
Осумнаесет притвореници претходно беа евакуирани за време на пожарот што избувна во притворското одделение во затворот во Битола.
Службените лица во затворот најпрвин со противпожарни апарати се обиделе самите да го изгасат пожарот, но бидејќи не успеале, веднаш почнале со евакуација на 18 притворени лица кон шеталиштето за притворени и повикале надворешно обезбедување, пожарна и брза помош. Пожарот за кратко време бил локализиран.
Како што објави „Макфакс“, притворениците биле пренесени во други казнено-поправни установи.
