Комбе кое претходно беше одземено при превоз на нежигосани и бесправно посечени дрва, а кое пред околу еден месец судот го вратил на сопственикот, повторно е одземено во нова акција на „Национални шуми“ во Прилеп.
Според објавата на Кире Михаилов, заменик-директор на „Национални шуми“, возилото било пронајдено во шумскиот склад на подружницата „Црн Бор“ – Прилеп и по вчерашната контрола повторно е одземено како доказ за кражба и нелегален превоз на огревни дрва.
„Комбето кое го гледате на сликава пред извесен период било одземено при превоз на нежигосани и бесправно посечени дрва во Прилеп… пред околу еден месец од страна на судот беше вратено. Сега, по нова кражба, повторно го одземавме,“ пишува Михаилов во својот статус.
Тој во објавата поставува и отворено прашање до правосудните органи: за колку време судот повторно ќе го врати возилото на истиот осомничен дрвокрадец, дозволувајќи повторно нелегални сечи и принудувајќи ги шумарските служби постојано да интервенираат. „Дајте не се заебавајте со нас и со сите граѓани… кој кого овде заебава?“ вели заменик-директорот, додавајќи дека довербата во системот е сериозно разнишана.
