Актерот Михајловски со вознемиреност и разочараност сподели фејсбук статус во кој го опишува ужасниот мирис на загаден воздух во скопската населба Козле, за време на една од редовните прошетки со кучињата.
„Скопје/Козле завчера околу 23:30 мирисаше/смрдеше на отров. Смрдеше на ‘амбуланта’, на ‘болница’. Смрдеше на смрт“, започнува актерот својот статус, опишувајќи го срамното искуство. „Ги прошетав кучињата 20тина минути. Јакната ми мирисаше на отровот, а и крзното на кучињата мирисаше на истото. Тоа што мирисаше можеше и да се види во воздухот. Како во гасна комора“, додава тој.
Михајловски ја нагласува сериозноста на ситуацијата, истакнувајќи дека деца кашлаат, болниците се полни, а воздухот е токсичен. „Децата ни кашлаат, болниците се полни, се гушиме. И така е 15/20/25 години?“, прашува тој, нагласувајќи дека никој не реагира на алармантната состојба.
Актерот го критикува и системот, кој според него ја нормализира оваа абнормална ситуација, додавајќи: „Никому не му пречи. Можеби континуитетот го нормализира ненормалното, можеби сме заљубени во џелатот, или едноставно сме се ‘навлекле’ на смрадот“.
Во продолжение на својот статус, Михајловски поставува провокативно прашање: „Дали тие што го одобриле тоа, очигледно горење на нечиј отпад, дали имаат деца, и дали нивните деца дишат некој друг воздух?“ Со овие зборови, тој повикува надлежните да ја разгледаат сериозноста на загадувањето на воздухот и да преземат конкретни мерки за заштита на здравјето на граѓаните.
Неговата реакција е уште едно потсетување за алармантното загадување на воздухот во Скопје, кој стана сериозен проблем за здравјето на скопјани.
