Лидерот на ВМРО-ДПМНЕ, Христијан Мицкоски, на митингот во Свети Николе остро ја критикуваше опозицијата, обвинувајќи ја дека со години ја уништувала државата и ја држела на дното.
„Секој од вас, длабоко во себе знае дека луѓето од опозицијата кои се нудат за алтернатива се луѓе кои Македонија со години ја упропастуваа и ја држеа силно закована на дното. Луѓе кои не изградија ништо за народот, а за себе си обезбедија привилегии, удопства, дворци, хациенди и замоци“, изјави Мицкоски.
Тој додаде дека опозициските функционери се соочуваат со „време на одговорност“, бидејќи, како што рече, „се стега обрачот и околу нив и околу оние кои упорно ги штитат“.
„За тие што ги штитат, пак, претседателот на СДСМ, Венко Филипче, ќе каже дека биле големи професионалци, а тие кои што ги штитат и се нивниот последен бастион, се малкумина обвинители и судии, и поради нив денеска довербата на народот во обвинителите и судиите е скромни 2 проценти. Тие два проценти доверба се последица на секој неказнет криминал, на сознанието дека повеќе од 100-тина пријави држат во фиоки и ја штитат својата политичка олигархија по секоја цена. Тие малкумина се нивните лакеи и измеќари, кои што се уште и служат на претходната влада на СДСМ и ДУИ“, изјави Мицкоски.
Тој порача дека за СДСМ овие избори „не се избори за спас на Македонија, туку избори за спас на нивните лични кариери“, и ги повика граѓаните на масовна излезност на 19 октомври.
„Затоа ве повикувам на 19-ти октомври да гласате масовно за дела, поддржете го нашиот кандидат за градоначалник на општина Свети Николе, Дејан Владев. Човек кој е вистинскиот избор за тебе, твоето место и твојата иднина, докажан како чесен и посветен во Свети Николе“, рече Мицкоски.
