Првиот човек на ВМРО-ДПМНЕ, Христијан Мицкоски ја коментираше кривичната пријава против градоначалникот на Кочани Љупчо Папазов, поради именувањето на директор на училиште кој, како што велат од МВР, немал положено испит во законски утврдениот рок.
Мицкоски вели дека Папазов го именувал единствениот кандидат кој што се пријавил на огласот, а направи и споредба со струшкиот градоначалник кој назначил директорка на училиште со завршено средно образование, но за него, вели претседателот на ВМРО-ДПМНЕ, нема кривична пријава.
„Читам денес МВР на Спасовски и Ковачевски обелодениле “голем” криминал. На градоначалникот на Кочани Љупчо Папазов му поднеле кривична пријава зошто го именувал единствениот кандидат кој и се пријавил на огласот за директор на Основното училиште. Значи не е тендер, не е договор во 4 очи, туку одлука за именување на директор кој не бил по кејфот на власта. Патем да напоменам нема кривична пријава за Мерко кој назначил за директор на училиште средношколка. Нормално нема кривична пријава зошто зелените од ДУИ ќе се налутат на СДСМ.
Со ваква власт, нема зима за криминалците. А Папазов е силен, и добро знае дека колку тие посилно притискаат, толку пожестоко ќе бидат поразени. Е потоа ќе има вистинска одговорност за вистинските криминали“, вели Мицкоски.
