Ако е увезена инфлацијата тогаш се поставува прашањето зошто еврозоната има два пати помала инфлација од Македонија во март, вели претседателот на ВМРО-ДПМНЕ проф. д-р Христијан Мицкоски одговарајќи на новинарско прашање кој е неговиот коментар во однос на зголемената инфлација во државата.
Мицкоски истакна дека додека Македонија само за месец март се соочува со инфлација од 14 проценти, во еврозоната истата е два пати помала, посочувајќи дека владата на ДУИ и СДСМ знае дека за неколку месеци си заминува па затоа се обидува да ги испокраде граѓаните и да избега од правдата, но како што рече тој нема да можат да се сокријат.
Во март е повеќе од 14 проценти инфлацијата во Македонија, а пак во еврозоната е два пати помала. Не е тоа. Проблемот е затоа што ем не ги бидува, ем не знаат, ем многу крадат. Знаат дека доаѓа денот, за неколку месеци од денеска заминуваат и мислат дека сега ќе испокрадат и ќе избегаат потоа од државата и правдата нема да ги стигне. Но јас ве уверувам дека нема каде да се скријат. На крај на свет ќе ги најдеме и ќе ги донесеме овде, но и со куферите да ги вратат парите на народот што ги украле. Јас ви го гарантирам тоа, дециден е Мицкоски.
