Градежен работник од Велес починал вчера попладне откако врз него паднал метален профил додека извршувал работни задачи на градилиште во индустриска зона на подрачјето на општина Петровец.
Како што информира Министерството за внатрешни работи, станува збор за Е.А. (23), а несреќата се случила на објект во изградба на фабрика. Според информациите од полицијата, младиот работник од здобиените повреди починал на самото место.
Случајот бил пријавен во 15:00 часот во СВР Скопје, по што на местото пристигнале полициски екипи и Итната медицинска помош. Лекар констатирал смрт на лицето.
По насоки на јавен обвинител, телото на починатиот е предадено на обдукција. За настанот бил известен и трудов инспектор, а увид на местото извршила увидна екипа на СВР Скопје.
Надлежните институции работат на утврдување на околностите под кои се случила несреќата.
