Германскиот канцелар Фридрих Мерц порача дека од Украина се очекува да обезбеди безбедни и економски стабилни услови, со цел младите мажи да останат во земјата и да ѝ служат, наместо да заминуваат во други европски држави. Тој ова го истакна во обраќање до украинскиот претседател Володимир Зеленски.
„Економскиот капацитет ќе биде неопходна гаранција дека Украина ќе може уверливо да ја одврати Русија во иднина. Драг Володимире, сакам ова отворено да го кажам: тоа подразбира и одредени очекувања за Украина. Тоа вклучува – и вие го знаете тоа, веќе разговаравме за ова во Брисел – дека Украина мора да биде организирана на таков начин што нејзините млади мажи ќе ѝ служат на безбедна и економски здрава Украина, а не да заминуваат во Германија, Полска или Франција, како што е случај сега“, нагласи Мерц во Париз по состанокот на Коалицијата на подготвените, пренесува „Укринформ“.
Според него, станува збор за очекување кое Украина „може и мора да го исполни“. Во меѓувреме, украинската влада на 26 август ја измени процедурата за преминување на државната граница, со што мажите на возраст од 18 до 22 години добија можност непречено да ја напуштаат земјата за време на воената состојба.
Измените стапија на сила на 28 август. Во Германија моментално живеат околу 1,2 милиони Украинци, а нивниот број во последниве години расте, најмногу поради младите мажи под 22 години, наведува украинската агенција.
