Заменик-претседателот на Советот за безбедност на Русија, Дмитриј Медведев, денеска изјави дека колку повеќе западните земји трошат на поддршка за Киев, толку повеќе територии на крајот ќе ѝ се вратат на Русија и „крајот на режимот во Киев ќе биде пострашен“.
Медведев го нарече украинското раководство, кое во текот на неколку години, како што рече, проневери милијарди долари западно финансирање, „крвави кловнови од Киев“ (ККК), пренесува Тас.
– Колку повеќе западниот свет троши на поддршка за ККК, толку пострашен ќе биде крајот на историјата за режимот на крвавите кловнови од Киев. И толку поголема ќе биде нашата територија која на крајот ќе ѝ се врати на нашата родна Русија – наведе Медведев на Телеграм.
Тој истакна дека, дури и земајќи ја предвид „корупцијата на режимот во Киев“, Западот издвоил „критично големи суми“ за Украина. „Со овие пари, можевме да изградиме нова, неутрална и просперитетна Украина. Но, не ни беше судено“, додаде Медведев.
Заменик-шефот на рускиот Совет за безбедност потсети на акциите на САД во Авганистан, кога меѓу 2001 и 2021 година, Вашингтон потрошил 2,3 трилиони долари само за да „ја пренесе власта од Талибанците на Талибанците“.
– Западната помош за режимот во Киев ќе доведе до ист исход како што САД доведоа до тоа во Авганистан. Нашите граѓани и руските власти ќе се вратат на своите исконски руски земји, заклучи Медведев.
