Полициската управа во Црна Гора соопшти дека припадниците на Регионалниот центар за безбедност „Центар“ – Одделот за обезбедување Подгорица, постапувајќи по сознанијата што им ги соопшти Центарот за ромски иницијативи Никшиќ, поднеле кривична пријава против Ф.Е. (42) поради сомнение дека сторил кривично дело трговија со луѓе на штета на 13-годишно девојче.
– Се сомничи дека на 16 јули со злоупотреба на доверба и зависност го регрутирал засегнатото девојче со цел да склучи незаконски детски брак, при што се стекнал со противправна корист од 10.000 евра – соопшти полицијата.
Трговијата со луѓе, односно продажбата на девојчиња со цел брак, за жал не е ретка појава во Црна Гора.
Со години се регистрирани случаи на продавање на девојчиња за различни суми на пари, најчесто од роднини. Поради ова неколку лица завршија на суд.
Вишото државно обвинителство во Подгорица пред две години го потврди обвинението против маж кој живее во Подгорица кој ги продал своите три ќерки.
Во некои случаи, девојките се продаваат во странство за брак.
