Маргот Роби откри дека некои фанови мислеле дека „Барби“ е хорор-филм.
33-годишната актерка глуми стереотипна Барби во блокбастерот на режисерката Грета Гервиг. Таа, всушност, ја оживеа култната кукла на американскиот производител на играчки „Мател“.
А неодамна сподели чудна теорија, што ја слушнала во врска со филмот.
Во видеоинтервју за „Ел“, Маргот рече: „Најчудната теорија на фановите што сум ја слушнала за филмот е дека, всушност, е хорор-филм. И ова сигурно ќе ги изненади сите. „Ох, ќе одиш да го гледаш Барби? Страшен е и има сцени со крв!“, ми рече некој, а јас му одговорив: не е, те молам не ја шири таа шпекулација. Не сакам љубителите на хорор да бидат разочарани.
Маргот се надева дека луѓето ќе формираат мислење за Барби – дури и ако не им се допаѓа филмот.
Во разговор со „Ентертејнмент тунајт“, Маргот објасни: „Толку сум возбудена. Сега сме во фаза кога го споделуваме со светот. Секогаш постои нешто кога снимате филм, го сакате и се надевате дека на луѓето ќе им се допадне. Па дури и ако не им се допаѓа, се надевам дека ќе формираат мислење“.
Во меѓувреме, Маргот неодамна откри дека многу ретко си играла со барбики како мала.
Русокосата убавица, која порасна во Квинсленд, Австралија, призна дека не била голем љубител на кукли.
„Јас лично немав барбики на кои можам да се сетам“, изјави таа за „Пипл“. „Сестра ми имаше и се сеќавам дека мојата братучетка имаше многу. Понекогаш си играв со нив, но всушност не бев по барбиките како дете“.
На прашањето каква била како дете, Маргот одговори: „Бев девојче, кое се тркала во кал“.
