Македонската женска тениска репрезентација успеа да стигне до 2:1 победа над Финска во третото коло од трета Европска зона во Били Џин Кинг купот, триумфирајќи во клучниот меч во двојки
Лина Ѓорческа и Магдалена Стоилковска со 6:4/6:1 беа подобри од Лаура Хиетаранта и Анастасија Куликова, за трета победа во три кола, пред утршниот меч со Исланд.
Во решавачкиот дуел во двојки во првиот сет Финска поведе со 2:1, но потоа следуваше серија од четири гема за Ѓорческа и Стоилковска кои дојдоа до предност од 5:2, за потоа противничките да направат брејк и да стигнат до 5:4. Сепак 10.гем им припадна на македонските тенисерки кои сетот го добија со 6:4.
Во вториот сет при резултат 2:1 за Македонија сервираше Ѓорческа се одиграа 18 поени и на крајот гемот им припадна на нашите тенисерки кои ја продолжија низата и сетот го завршија со 6:1 во гемови. Мечот траеше 1 час и 28 минути.
Во сингл мечевите Стоилковска загуби од Хиетаранта со 2-0 во сетови, а Ѓорческа ја совлада Куликова со 2-1 во сетови со пресврт откако губеше 1-0.
Утре Македонија во четвртото коло игра против Исланд.
Фото: МК Тенис
