Европол во соработка со француските истражни органи разоткри меѓународна мрежа на фалсификатори која во последните неколку години продавала вино од Северна Македонија под етикети на реномирани француски вина од Бургундија. Според информациите објавени од српскиот портал vinoifino.rs, илјадници шишиња со македонска смедеревка биле препродадени како скапоцено француско шардоне, при што цените достигнувале и до 250 евра за шише.
Како функционирала шемата?
Според истрагата, винари од познатите француски региони Шабли и Монраше, соочени со недостаток на шардоне и зголемена побарувачка на пазарот, увезувале вино од македонската винарница „Газда Ѓоко“ од селото Мрзенци. Ова вино, по увозот во Франција, било дополнително одлежувано во француски барик буренца за да добие пософистицирана арома и потоа било пласирано на пазарот како автентично бургундиско шардоне.
Фалсификуваното вино било нудено во луксузни ресторани, вински барови и специјализирани бутици во Франција, Германија и Велика Британија.
Како се открила измамата?
Истрагата започнала по поплаки од француски сомелиери и вински експерти, кои забележале отстапки во профилот на некои примероци на шардоне од Бургундија. Тие посочиле дека одредени вина, иако носеле престижни етикети, имале невообичаени ноти и текстура што не е карактеристична за шардоне од регионот.
Францускиот енолог Теле Репомаше, кој бил ангажиран од една од винариите под истрага, изјави за vinoifino.rs дека македонската смедеревка оставила силен впечаток поради нејзината минералност и соленост:
“Тоа е феноменално вино, со карактеристики слични на бургундиското шардоне. Кога ја дегустиравме во едно балканско бистро на пат кон Грција – бевме воодушевени. Немаше начин да ѝ одолееме, особено по таа цена.”
Шок за македонската винарница
Сопственикот на винарницата „Газда Ѓоко“, Ѓоко Трпески, изразил шокираност од веста дека неговото вино било продавано по толку висока цена.
“Бев шокиран кога дознав дека нашата смедеревка се продава за над 250 евра. Ние ја продадовме за 50 евроценти по литар, како и секогаш.”
Трпески нагласил дека неговата винарница работи законски и никогаш не била информирана дека виното ќе биде препродавано како француско.
Санкции и натамошна истрага
Француското обвинителство во соработка со Европол продолжува со истрагата, а досега се идентификувани најмалку седум лица инволвирани во мрежата. Засега нема индиции дека македонската винарница била свесна за измамата, но француските истражители разгледуваат и можни врски со други компании.
Овој скандал повторно го отвора прашањето за контролата на потеклото на вината и строгите регулативи што се применуваат на европскиот вински пазар. Истовремено, тој го става фокусот на македонските вина, кои, иако неправедно искористени во оваа измама, докажуваат дека можат да парираат на најголемите француски брендови.
