Британската полиција вчера приведе 55 лица на митингот на забранетата организација „Палестинска акција“ пред парламентот во Лондон, соопшти полицијата.
Демонстрантите на плоштадот на Парламентот носеа транспаренти во поддршка на организацијата, која беше забранета претходно овој месец според антитерористичките закони на земјата.
Учесниците на митингот, кои носеа кефии (традиционални карирани палестински црно-бели шалови), беа ставени во полициски комбиња.
Британскиот парламент ја забрани „Палестинска акција“ на 5 јули откако активисти од движењето ја нападнаа базата на Кралските воздухопловни сили и оштетија авиони во знак на протест против поддршката на Велика Британија за Израел. Членството во организацијата веќе е казниво со затвор до 14 години.
„Палестинска акција“ ја опиша одлуката на парламентот како авторитарна. Високиот суд во Лондон ќе ја разгледа жалбата против забраната за пропалестинското движење во понеделник. „Палестинска акција“ е меѓу групите кои редовно ги напаѓаат изведувачите на одбранбени проекти и други компании во Велика Британија со врски со Израел уште од почетокот на конфликтот во Газа.
Дури и пред да стапи на сила забраната, полицијата уапси десетици поддржувачи на „Палестинска акција“.
