Британската министерка за надворешни работи Лиз Трас, која утре се очекува да биде именувана за нов премиер, изјави дека во првата недела на власт ќе започне акција насочена кон решавање на проблемот со зголемување на сметките за струја и зголемување на снабдувањето со енергија.
Се очекува владејачката Конзервативна партија утре да ја именува Трас за нов лидер и премиер, во време кога земјата се соочува со можна продолжена рецесија, висока инфлација и незадоволство на работниците, наведува „Ројтерс“.
Во колумна во „Сандеј Телеграф“, Трас рече дека разбира дека големите трошоци за живот ги предизвикуваат Британците и додаде дека ќе преземе „одлучна акција за да им овозможи на семејствата и бизнисите да ја поминат и оваа и следната зима“.
„Сандеј тајмс“ цитираше извори од Министерството за финансии дека нејзиниот план лесно може да надмине 100 милијарди фунти (115 милијарди долари), од кои повеќето ќе бидат додадени на задолжувањето на државата.
Трас одби да зборува за деталите од плановите, објаснувајќи дека не е соодветно да навлегува во нејзината стратегија пред да ја преземе премиерската функција.
Таа изјави дека нејзиниот пристап ќе биде двоен: ќе започне итна акција за решавање на кризата околу трошоците за живот, како и план за постигнување економски раст. Нејзиниот план е да формира Совет на економски советници, со цел да ги добие најдобрите идеи за економијата.
