Соопштение на Левица:
Денес, 9 мај – Денот на победата над фашизмот, официјална делегација на Левица, составена од пратениците Амар Мециновиќ и Јована Мојсоска, заедно со раководителот на Црвена младина, Милица Давчева, положи свежо цвеќе и оддаде почит на вечниот покој на хероите на Партизанските гробишта во Бутел.
На овој ден, се потсетуваме дека слободата не е подарок, туку е резултат на пожртвуваната борба на илјадници храбри борци кои, под знамето на антифашизмот и народноослободителната борба, се исправија против окупаторите и нивните соработници. Секоја генерација има обврска да го чува тој аманет, да го продолжи тој пат.
Македонскиот народ и покрај сите историски неправди, поделби, репресии и обиди за негирање на неговото постоење, не потклекна, туку крваво ја избори својата слобода, национална самобитност и социјална правда. АСНОМ и НОБ се темелот на македонската државност – антифашизмот не е реторика, туку суштина на нашето постоење.
Во време кога новите облици на фашизам се обидуваат да ја замаскираат својата природа со евроатлантски флоскули и историски ревизионизам, кога се ставаат на рамниште жртвите и агресорите, а домашните власти молчат пред негирањето на фашистичката окупација – повеќе од кога било потребно е да се застане гласно во одбрана на историската вистина и народната чест!
Нашата борба не е завршена. Таа продолжува и денес во одбрана на социјалната правда, против капиталистичкото угнетување, против новиот империјализам, против неофашистичките тенденции кои се закануваат на секоја работничка класа и секој слободољубив народ.
Да не дозволиме никогаш да биде избришана крвавата, но достоинствена историја на македонскиот отпор!
Вечна слава на паднатите борци за слободна Македонија!
Еднаш победивме фашизам – ќе победиме пак!
