Косовскиот премиер, Албин Курти, денеска се сретна со директорот на американската Централна разузнавачка агенција (ЦИА), Вилијам Барнс, и ја оцени посетата како важен историски момент во билатералните односи меѓу Косово и САД.
На средбата беше нагласена заложбата на косовската Влада и безбедносните и разузнавачки институции, предводени од Косовската разузнавачка агенција (КОА), за унапредување на соработката со ЦИА.
„Историската посета на директорот на ЦИА, Вилијам Барнс, на Косово е високо ценета од Владата на Република Косово. Оваа посета е доказ за силните и стабилни односи меѓу двете земји и претставува златна можност за продлабочување на стратешката соработка, со цел мир и безбедност во регионот и пошироко,“ се наведува во соопштението на косовската Влада.
Премиерот Курти му се заблагодарил на директорот Барнс за континуираната поддршка и ја изразил својата посветеност за продлабочување на соработката во области од заемен интерес. Тој истакнал дека американските вредности на демократијата, владеењето на законот и непоколебливата евроатлантска ориентација ќе останат централен столб на доброто и демократско владеење во Косово.
Курти, исто така, го информираше Барнс за економскиот раст и развој, како и за социјалниот и демократскиот напредок на Косово, нагласувајќи дека сите внатрешни безбедносни предизвици успешно се управуваат со моќта на праведниот закон на една демократска држава.
