Шеснаесетгодишниот Д. П. на православен Божиќ се обидел да ги убие своите баба и дедо во семејната куќа во белградската населба Звездара, по што си нанел тешки прострелни повреди. Додека лекарите во Военомедицинската академија (ВМА) се борат за животите на дедото и внукот, истрагата открива вознемирувачки детали кои укажуваат дека трагедијата можела да има уште поголеми размери.
Според неофицијални информации од истрагата, мотив за нападот биле пари. Малолетникот наводно побарал 18.000 евра од своите баба и дедо, а откако тие одбиле да му ја дадат сумата, следела пукотница. Дедото, З. П. (68), бил застрелан директно во главата и се наоѓа во животозагрозувачка состојба, додека бабата С. П. (67) била погодена во раката и, според лекарите, е надвор од животна опасност.
По нападот, Д. П. си нанел прострелни рани во стомакот и главата и бил пронајден во локва крв. Тој исто така се наоѓа во критична состојба.
Дополнителна загриженост кај жителите на Звездара предизвикале информации дека малолетникот можеби не бил сам. Според тврдења на соседи, Д. П. дошол во куќата во придружба на уште едно младо лице, по кое полицијата интензивно трага. Еден од соседите изјавил дека по пукањето дедото истрчал од куќата облеан во крв и побарал помош, додавајќи дека, според кажувањата на полицијата, постоел сомнеж за план за дополнителни напади.
Трагедијата добива уште потешка димензија ако се земе предвид дека Д. П. и неговиот брат биле одгледани токму од бабата и дедото, откако мајката ги напуштила додека биле деца. Според неофицијални информации, младиот човек и претходно бил познат на институциите, имал пријави за семејно насилство и наводно по него веќе била распишана полициска потрага.
Местото на настанот со часови било под силно полициско обезбедување. Дворот бил ограден со полициски ленти, а форензичарите и инспекторите детално ги истражувале трагите. Улицата Јовијанова и понатаму е под засилен надзор, додека трае потрагата по лицето за кое се сомнева дека било со напаѓачот.
Истрагата е во тек, а надлежните најавуваат дека јавноста ќе биде дополнително информирана откако ќе се утврдат сите околности на овој тежок и вознемирувачки случај.
Извор: телеграф.рс
