Кремљ денеска ги осуди „убиството и елиминацијата“ на иранските лидери во воздушните напади на САД и Израел еден ден откако полуофицијалната иранска новинска агенција „Фарс“ потврди дека Али Лариџани, советник на покојниот врховен ирански лидер, ајатолахот Али Хамнеи, е убиен во Техеран.
„Недвосмислено ги осудуваме сите дејства насочени кон оштетување на здравјето или дури и убивање или елиминација на членови на раководството на суверен и независен Иран, како и раководството на други земји. Ги осудуваме таквите дејства“, изјави портпаролот на Кремљ, Дмитриј Песков, пред новинарите кога беше прашан за смртта на Лариџани.
Русија, која изгради и помага во работењето на единствената нуклеарна централа во Иран, остро ги критикува воздушните напади на САД и Израел врз Иран, нејзиниот близок партнер. Москва повика на прекин на огнот и преговори.
„Волстрит џурнал“, повикувајќи се на информирани извори, вчера објави дека Русија ја проширува размената на разузнавачки информации и воената соработка со Техеран обезбедувајќи сателитски снимки и подобрена технологија за беспилотни летала за да му помогне на Иран да ги таргетира американските сили во регионот.
Песков сугерира дека веста е лажна. „Како што знаете, сега циркулираат многу извештаи за оваа војна. Тие не се ништо повеќе од дезинформации, па затоа не сметаме дека е потребно да коментираме за секој од нив“, рече Песков.
„Сепак, официјални претставници на Соединетите Американски Држави коментираа за ова прашање велејќи дека немаат никакви информации за оваа тема“, додаде портпаролот на Кремљ.
