И покрај одличните настапи на репрезентацијата на Босна и Херцеговина на Европското првенство во кошарка, каде во неделата го совладаа бранителот на титулата Словенија, Советот на министри на таа земја се уште не им ги исплатил ветените 100.000 евра за да можат да учествуваат на овој конкуренција.
Предводени од Јусуф Нуркиќ и Џанан Муса, Босна е блиску до пласман во нокаут-фазата. БиХ има скор 2-1, славеа против Унгарија и Словенија, а доживеаја пораз од Германија.
Во последните две рунди БиХ во вторник и среда игра со Франција и Литванија, за пласман во наредната рунда мора да забележат една победа.
Доколку влезат во осмина-финалето, со оглед на проблемите со кои се соочија пред ЕП, тоа би бил еден од најголемите успеси на кошаркарската репрезентација на БиХ.
Репрезентацијата на БиХ на континенталниот шампионат отпатува буквално без пари. Кошаркарската федерација на БиХ, која е речиси нефункционална, претходно побара помош од државните институции за заминување на машката и женската репрезентација на меѓународни натпреварувања.
Во средината на август, Советот на министри на БиХ одобри 200.000 марки (околу 100.000 евра) за подготовки и авионски билети. Тие пари беа издвоени од буџетот, но досега не се префрлени кај кошаркарите.
