Обвинението нема никаква основа, велат од Клиниката „Жан Митрев“, откога Јавното обвинителство денеска поднесе обвинение за измама против доктор Жан Митрев и неговата клиника.
„Се гледаме на суд е нашиот одговор на денешната одлука на Основното јавно обвинителство да се гони д-р Жан Митрев за измама. Оваа лакрдија од неосновани напади на суд ќе мора да се докаже, а ќе биде тешко да се докаже бидејќи вистината е дека ниту еден пациент не бил измамен и сите третмани и процеси во болницата биле јавни и транспарентни и во интерес на пациентите. Со тоа на суд ќе падне и самото обвинение на ОЈО.
Повторуваме дека Клиниката и во најтешките периоди работеше според највисоки здравствени стандарди, транспарентно и во согласност со веќе утврдени и дозволени методи на лекување кај нас и во светот. Со ова ќе ги докажеме вистината и фактичката состојба за нашата работа дека сè што беше направено во Клиниката „Жан Митрев“, беше за пациентите и според дозволени методи и стандарди на лекување.
Ние како клиника во текот на целиот овој процес целосно соработувавме со институциите и ги отстапивме сите наши материјални и човечки капацитети со цел вистината да излезе во јавност и транспарентно да се докаже дека наша цел и функција отсекогаш биле да лекуваме и да им дадеме најдобра медицинска нега на пациентите. Така и ќе остане во иднина“, велат од Клиниката „Жан Митрев“.
