Главниот град на Кина, Пекинг, ги затвори градските паркови и воведе други ограничувања бидејќи земјата се бори со бранот на зараза со коронавирус од 10.729 нови случаи.
Во јужната индустриска област Гуангжу и големиот западен град Чонгкинг, повеќе од пет милиони луѓе сега се во изолација.
Голем дел од 21 милион жители на Пекинг биле подложени на задолжително дневно тестирање, а пријавени се 118 нови случаи на зараза.
Многу градски училишта се префрлија на учење на далечина, болниците имаат ограничени услуги, некои продавници и ресторани се затворени, а нивниот персонал е ставен во карантин.
Видеата на социјалните мрежи покажаа луѓе во некои области како протестираат или се борат со полицијата и здравствените работници.
Владата соопшти дека го намалува времето што патниците кои пристигнуваат во Кина ќе треба да го поминуваат во карантин, но не е веднаш јасно кога и каде ќе стапат на сила правилата и на кого ќе се применуваат.
Амбасадата на САД оваа недела го обнови својот совет до граѓаните да избегнуваат патување во Кина освен ако е апсолутно неопходно.
Кинеските лидери вчера ветија дека ќе одговорат на фрустрацијата на јавноста поради нивната тешка стратегија „нулта-ковид“ што стави во карантин милиони луѓе и сериозно ја наруши економијата.
