По нејзиното појавување на „Мет-гала 2022“ во фустан на Мерлин Монро, Ким Кардашијан изрази благодарност за уште едно парче од модната историја: приврзок што некогаш го носеше принцезата Дијана.
Американската реалити ѕвезда го купи крстот Аталах, уникатно парче накит од аметист, кој принцезата Дијана го носеше во посебни пригоди.
Приврзокот во облик на крст има големи камења од аметист, врамени со дијаманти од 5.2 карати.
Накитот беше ставен на продажба во „Сотби’с“ во Лондон во рамки на аукцијата на кралска благородна колекција (Sotheby’s London Royal and Noble), во средата.
Кардашијан го купи приврзокот за 197.453 долари, победувајќи уште тројца други наддавачи во последните пет минути од продажбата. Според „Сотби’с“, сумата била повеќе од двојно поголема од неговата проценета вредност пред аукцијата.
Како и чантата Лејди Диор што ја овековечи, принцезата Дијана го претвори крстот Аталах во култно модно парче кога го носеше на гала за поддршка на Birthright, добротворна организација која се залага за човековите права за време на бременоста и породувањето, во октомври 1987 година.
