Со сведочење на обвинетиот Влатко Кешишев денеска во Основниот кривичен суд Скопје продолжи судскиот процес за грабнувањата и убиствата на 14-годишната Вања Ѓорчевска и велешанецот Панче Жежовски.
Во својот исказ, Кешишев изјави дека првпат ги видел Вања и Панче во објавите на Фејсбук за нивното исчезнување. За својата улога во случајот, тој посочи дека главно бил задолжен да чува стража.
Пред неговото сведочење, адвокатот Игор Ефремов побара судијата да го отстрани од судницата првообвинетиот Љупчо Палевски-Палчо, бидејќи неговото присуство би можело да влијае врз вистинитоста на исказот.
Кешишев сведочеше дека првично дал изјава во која тврдеше дека Палевски нема врска со убиствата, но подоцна ја повлекол, тврдејќи дека бил присилен од него додека заедно биле спроведувани во затворското комбе.
„Мислев дека копаме за злато“
Според сведочењето, Кешишев признал дека бил присутен при копањето на дупката во Велес, каде подоцна било пронајдено телото на Панче. Но, тој тврди дека во тој момент мислел дека се копа за злато.
„Во недела дојде Велибор во работно одело и отидовме на местото наречено Рудник. Таму со лопата копавме, без многу прашања. Кога подоцна прашав што е целта, ми беше кажано дека е за киднапирање лица. Тогаш сфатив дека работата е сериозна“, изјави обвинетиот.
Тој додаде дека неколку пати се враќале на местото за да продолжат со копањето, а еден од обвинетите му рекол дека „не треба никој да знае, бидејќи може и глави да летаат“.
Како беше грабнат Панче?
Во својот исказ, Кешишев тврди дека не бил директно вклучен во киднапирањето на Панче, но бил присутен во критичните моменти.
„Утрото кога го грабнаа Панче, јас и Палчо бевме во автомобил. Ме остави на паркинг, а Велибор преку моторола му кажуваше на Палчо дека патот е чист. Подоцна дознав дека Панче бил убиен кога се вративме во штабот“, рече Кешишев.
Според него, целта на грабнувањето на Жежовски била неговото возило, кое обвинетите планирале да го искористат за киднапирањето на Вања.
„Чекав и слушнав тап истрел“ – Што се случувало во Бразда?
На прашањето за неговата улога при киднапирањето на Вања, Кешишев изјави дека му било наредено да ја премести колата и да отвори гепек.
„Кога пристигнавме во Бразда, останав подолу и не гледав што прават. Во еден момент слушнав тап истрел. Потоа ги видов Палчо и останатите како чистат со WD40, ги бришат лопатите и копачот. Сфатив што се случило кога видов слика на Фејсбук со детето“, сведочеше обвинетиот.
Тој додаде дека подоцна му било наредено да ги фрли лопатите и копачот во дупка покрај патот, а потоа заедно со другите се вратил во штабот.
Како беше планирано киднапирањето на Вања?
Според исказот на Кешишев, планот за грабнување на Вања бил направен од Палевски и Велибор Манев.
„Го зборуваа тоа подолго време, но јас го сметав како фантазија. Кога почна да се реализира, сфатив дека се сериозни“, рече тој.
На прашањето дали знаел за мотивот на грабнувањето, Кешишев изјави дека му било кажано дека станува збор за уцена за пари, но не знаел детали.
Што следува?
На претходните рочишта, исказ даде и обвинетиот Боре Видевски, кој негираше поврзаност со убиствата. Според најавите, по сведочењето на Кешишев, треба да сведочат таткото на Вања, Александар Ѓорчевски, и на крај првообвинетиот Љупчо Палевски.
Според обвинението, групата обвинети планирала да ја киднапира 14-годишната Вања за да изнудат пари од нејзиното семејство. Панче бил грабнат заради неговото возило, кое требало да биде употребено во второто киднапирање.
Вања и Панче беа пријавени за исчезнати на 27 и 24 ноември 2023 година, а нивните тела беа пронајдени на 3 декември.
