Обвинетиот Влатко Кешишев одговарајќи на прашања на првообвинетиот за убиствата на Вања Ѓорчевска и на Панче Жежовски, Љупчо Палевски, рече дека Палевски поседувал црна кутија во која чувал снимени телефонски разговори и дека им пуштил некои од нив да ги слушаат.
На денешното рочиште Кешишев се соочи со Палевски иако одговараше на неговите вкрстени прашања свртен со грб кон него.
Кешишев негираше дека во седиштето на Десна видел или слушнал аудиоразговори, снимени телефонски разговори.
– Дали ви е познато дека поседувам такви материјали? – праша Палевски.
– Ти ни покажа и мислам дека на неколкумина ни пушти еден до два разговори – рече Кешишев.
Од одговорите на Кешишев се заклучува дека Палевски бил опседнат со бришењето на трагите од работите со кој бил во допир за време на убиствата, со спреј ВД 40 го чистел воланот, менувачот, лопатите.
Прашањата, вкупно 97, му ги поставуваше со персирање, господине Кешишев му се обраќаше Палевски на својот компањон во чии одговори на моменти се чувствуваше немир. На речиси половина од поставените прашања, Кешишев одговараше со не знам. На минатото рочиште раскажа се што се случило, повторувајќи неколкупати дека не се правда и оти ја зборува вистината.
