Идниот викенд Собранието ќе гласа за избор на новата влада, предводена од Христијан Мицкоски, а веќе во понеделник, на 24 јуни, новите министри ќе седнат во фотелјите на „Илинденска“, брифираат од ВМРО-ДПМНЕ.
Првичниот план Македонија да добие нова влада помеѓу верските празници Курбан Бајрам и Задушница, односно на 20 јуни, се помести за 24 јуни, за да имаат пратениците време од неколку денови да ги разгледаат програмата и кадровскиот состав на новиот владин кабинет.
Се планираше мандатарот Мицкоски да ги достави до Собранието програмата и листата со министри во понеделник, претседателот на Собранието Африм Гаши веднаш за следниот ден да ја закаже седницата и владата да се гласа во среда, а во четврток да биде примопредавањето на функциите.
За да се избегнат критиките од опозицијата дека пратениците ќе немаат време да ја разгледаат владината програма и биографиите на министрите, одлучено е предлогот за нова влада да го достават до Собранието во вторник.
