Иванка Трамп реши да се повлече од политиката, објаснувајќи дека сега приоритет и се „малите деца и приватниот живот“.
Доналд Трамп во вторникот ја започна својата кандидатура за претседателските избори во САД во 2024. Веста ја соопшти од своето одморалиште на Флорида. Со него беа присутни членовите на семејството, меѓу кои и неговата сопруга Меланија и синот Ерик. Таму бил и сопругот на Иванка, Џаред Кушнер, но таа не била таму.
„Многу го сакам татко ми. Но, овојпат приоритет им давам на моите мали деца и на мојот приватен семеен живот. Не планирам да се занимавам со политика“, рекла Иванка Трамп, пренесува „Гардијан“.
„Иако секогаш ќе го сакам и ќе го поддржувам татко ми, во иднина тоа ќе го правам надвор од политичката арена. Благодарна сум што ја имав честа да му служам на американскиот народ и секогаш ќе бидам горда на многуте достигнувања на нашата администрација“ додаде таа.
