Италијанскиот град Болцано воведува данок за сопствениците на кучиња, а новата мерка ќе ги опфати и туристите кои го посетуваат градот со своите миленици. Миленичињата кои патуваат веќе се навикнати да имаат пасоши, но сега ќе се соочат и со туристички данок во Болцано, пишува CNN .
Почнувајќи од 2026 година, сопствениците на кучиња што го посетуваат овој град во северна Италија, познат како порта кон Доломитите, ќе плаќаат дневен данок од 1,50 евра. Мерката е дел од поширока и контроверзна акција против кучињата и нема да ги поштеди ниту локалните жители. Од нив ќе се бара да плаќаат годишен данок од 100 евра по куче.
Според градските власти, иницијативата има за цел да ги покрие трошоците за чистење на улиците и да финансира нови паркови исклучиво за кучиња и нивните сопственици. Сепак, останува нејасно дали гласините за забрана на кучиња во редовните градски паркови ќе се остварат.
Воведувањето на данокот следи по уште една контроверзна мерка – барање од сопствениците да ја регистрираат ДНК-та на своите кучиња, за да може несобраниот измет да се поврзе со сопственикот и да се казни. Сопствениците кои не чистат по своите миленици моментално се соочуваат со казни до 600 евра.
Покраинскиот советник Луис Валчер, кој ја предложи мерката, објасни дека оние кои веќе ја регистрирале ДНК-та на своите кучиња ќе бидат ослободени од плаќање на новата такса во текот на две години. „Ова е фер мерка бидејќи се однесува само на сопствениците на кучиња“, рече Валчер. „Инаку, чистењето на тротоарите би било одговорност на целата заедница и мора да се каже дека единствената нечистотија на нашите градски улици е кучешкиот измет“.
