Администрацијата на американскиот претседател Доналд Трамп соопшти дека истражува дали Универзитетот Харвард и „Харвард Ло Ривју“, студентскиот весник на Правниот факултет на Харвард, ги прекршиле законите за граѓански права кога уредниците на списанието го забрзале објавувањето на статија напишана од член на расно малцинство.
Веста за новата истрага дојде неколку часа откако федерален судија се согласи да ја забрза тужбата од страна на Универзитетот Харвард со која се бара да се блокира одлуката на администрацијата на Трамп за замрзнување на 2,3 милијарди долари федерални пари, што се заканува да го попречи спроведувањето на клучни медицински и научни истражувања.
Во соопштението за истрагата од страна на Министерството за образование и здравство и човечки услуги на САД се наведува дека уредниците на „Харвард Ло Ривју“ можеби прибегнале кон „расна дискриминација“ кршејќи ги одредбите од Законот за граѓански права од 1964 година.
„Процесот на селекција на статии се чини дека избира победници и губитници врз основа на раса, користејќи систем во кој расата на научникот е подеднакво важна, ако не и поважна, од квалитетот на објавената работа“, рече Крег Трејнор, вршител на должноста помошник-министер за образование за граѓански права.
Откако ја презеде функцијата, американскиот претседател Доналд Трамп го заостри мерките против програмите за различност, еднаквост и инклузија кои имаат за цел да ја подобрат положбата на маргинализираните групи кои историски се соочувале со нееднаквост во Америка.
Трамп ги означи овие програми насочени кон помагање на малцинствата како дискриминаторски кон групи како што се белците и мажите.
Универзитетот Харвард во понеделникот соопшти дека ќе ја преименува својата Канцеларија за еднаквост, разновидност, инклузија и припадност во Канцеларија за живот во заедницата и кампусот.
