Маж од Македонија јавно бара помош од институциите и граѓаните за пронаоѓање на својот син, кој, според неговите информации, се наоѓа на територијата на Благоевград во Бугарија.
Станува збор за Ристе Венев, роден на 24 април 1992 година, кој се води како исчезнат. Последен пат бил евидентиран на 13 март 2026 година токму во Благоевград, објави 4news.mk. За случајот веќе се поднесени пријави и во полицијата во Македонија и во Бугарија, при што е распишана и официјална потрага.
Таткото посочува дека располага со документ од Министерството за надворешни работи на Македонија, во кој се наведува дека според информации од бугарските институции, неговиот син најверојатно се наоѓа во регионот на Благоевград.
Според неговите сознанија, постои можност Венев да престојува во хотел „Ерта Ком“, а неодамна бил забележан и во близина на централниот плоштад во градот.
Дополнително, таткото открива дека неговиот син има психичко заболување и во ситуации кога не ја прима редовно терапијата, знае да ја напушти Македонија и да замине во Бугарија.
„Барам помош од сите институции за да биде пронајден мојот син, но никој не ми помага“, вели очајниот татко.
Тој апелира до сите граѓани кои имаат каква било информација за местото каде се наоѓа Ристе Венев веднаш да пријават кај надлежните институции и да помогнат во неговото пронаоѓање.
