По барање на Турција, Интерпол издаде црвена потерница за лице осомничено за исчезнувањето на 25 килограми злато и 55 килограми сребро од судско депо во Истанбул.
На почетокот на месецот, судските службеници забележале дека од депото на Судот во квартот Бујукчекмеџе, каде се чуваат докази, недостигаат злато и сребро, чија вредност се проценува на над 147 милиони лири (околу три милиони евра). Исто така, било забележано дека долго време е отсутен еден од нивните колеги.
Турското обвинителство веднаш покрена истрага и утврди дека главниот осомничен отпатувал за Лондон, придружуван од својата сопруга, за која исто така е распишана потерница. Досега, во случајот е приведено само едно лице.
