Малиот грчки остров Антикитера, со само 45 постојани жители, започна необична иницијатива за привлекување нови жители, нудејќи финансиска поддршка и обезбедено сместување за оние што се подготвени да се преселат. Целта на проектот е да се спречи целосното исчезнување на населението и да се даде нов живот на островот кој се соочува со сериозни демографски предизвици.
Иницијативата, која ја организира Грчката православна црква на Китира, предвидува бесплатно сместување, храна и месечна финансиска поддршка од 500 евра по домаќинство во период од три години, што во целост изнесува околу 18.000 евра. Програмата е наменета пред сè за млади семејства и квалификувани работници со занаетчиски или практични вештини – пекари, рибари и други професии кои можат да помогнат во одржување на основните услуги на островот.
Антикитера се соочува со демографски проблеми: најголемиот дел од сегашното население е над 50 години, а бројот на деца е минимален. Поради тоа, проектот има за цел да привлече млади семејства кои ќе помогнат во ревитализацијата на заедницата, одржувањето на училиштата, продавниците и другите основни услуги, како и во зачувувањето на културното наследство на островот.
Сепак, иако на семејствата им се ветени нови куќи, нивната изградба сè уште не е започната поради административни доцнења, па до сега ниту едно семејство не се вселило. Сите кандидати ќе мора да поминат интервју пред конечната одлука, а планирано е да бидат примени најмногу пет семејства.
Антикитера е достапен со ферибот од островот Китира или од пристаништето Кисамос на Крит. Во зимскиот период на островот работи само една мала продавница со основни намирници, но постои електрична енергија и интернет, што овозможува основни услови за живот.
Проектот е дел од напорите на грчките власти и локалната црква да спречат демографска криза на малиот остров и да обезбедат нова шанса за живот за млади семејства кои сакаат мир, природа и заедница далеку од градската гужва, пренесува „Дневник“.
