Најдобриот стрелец во историјата на НБА, Леброн Џејмс ќе паузира неколку недели поради повреда на десното стапало, пренесува новинарот на ЕСПН, Адријан Војнаровски. Долгата пауза за „Кралот Џејмс“ практично значи крај на и онака многу „тенките“ плејоф амбиции на ЛА Лејкерс.
Џејмс се повреди во победата на неговиот тим над Далас Маверикс пред два дена. Лејкерси славеа во Далас и покрај тоа што во втората четвртина губеа со 27 поени.
Лејкерси моментално се наоѓаат на 12. место во поредокот на Западната конференција со скор од 29-32, но се на само една победа од 10. место кое води во плеј-офот.
Лејкерси ги очекуваат големи предизвици во наредниот период, бидејќи имаат поразителен скор од 36-62 кога играат без Леброн, откако тој пристигна во Лос Анџелес во 2018 година. Оваа сезона, првиот пик од драфтот во 2003 година пропушти 14 натпревари, а Лејкерси без него забележаа само пет победи.
Сезонава Леброн Џејмс има просек од 29,5 поени, 8,4 скока и 6,9 асистенции.
