Германија и Швајцарија сакаат да ги засилат полициските контроли на нивната заедничка граница за да се борат против илегалната миграција, се согласија германската министерка за внатрешни работи Ненси Фезер и членката на швајцарскиот Федерален совет Карин Келер-Сатер.
„Прашањата со миграцијата не се решаваат на национално ниво, туку на европско ниво“, рече Фезер за време на заедничката прес-конференција.
Блиската соработка е важна за да се забрза депортацијата на луѓето без право на азил, додаде Келер-Сатер, којa е и министерка за правда на Швајцарија.
„Сакаме да ги спречиме луѓето на кои не им е потребна заштита да ги преоптоварат нашите системи за азил“, рече Келер-Сатер. Планот, меѓу другото, предвидува заеднички полициски патроли во возовите кои патуваат од Швајцарија до Германија.
Исто така, борбата против шверцерите би се интензивирала со прекугранични претреси. Двете соседни земји веќе го договорија акциониот план за 2016 година, чии мерки ќе се прошират сега. Бројот на баратели на азил кои пристигнуваат во Германија преку таканаречената балканска рута е зголемен од септември, исто така на граничните премини со Швајцарија, рече Фезер. Во деновите на шпицот, до илјада мигранти влегле во Германија од соседните земји.
