Градоначалникот на Општина Центар Горан Герасимовски, денеска беше домаќин на министерот за локална самоуправа Златко Перински кадешто одржаа работна средба со членовите на општинскиот Совет.
На заедничката средба, градоначалникот Герасимовски го информираше министерот Перински за сите проекти што се имплементираат за развој на Центар.
„Разговаравме за сите тековни проекти што ги имплементираме од општинскиот, но и од државниот буџет. Реконструкцијата на спортската сала Работнички се одвива континуирано, ја завршивме првата фаза и ја отпочнуваме втората фаза. Со поддршка од државата после 50 години го враќаме симболот на Центар, добиваме нова и модерна спортска сала. Министерот го информирав за проблемот со хигиената во Центар кадешто надлежност има Град Скопје. Исто така дискутиравме и за планираните измени на Законот за локална самоуправа со цел зголемување на отчетноста на градоначалниците и транспарентноста на општините”, рече Герасимовски.
Посетата беше реализирана во рамки на иницијативата на Министерството за локална самоуправа „Каде што срцето е дома”.
