„21 век е, а луѓето во Перо Чичо сè уште газат кал и немаат вода. Тоа мора да се смени!“, напиша генералниот секретар на СДСМ, Александар Саша Димитријевиќ, во објава на социјалните мрежи.
Димитријевиќ заедно со кандидатот за градоначалник на Куманово, Мартин, носителот на советничката листа Томица и пратеникот Оливер, присуствуваа на маалска средба со жителите на Перо Чичо.
„Разговаравме отворено за проблемите, за пропустите на локалната власт, но и за решенијата што Мартин и тимот на СДСМ ги нудат“, напиша тој, додавајќи дека на претстојните избори е време „да се сврти нов лист“.
Димитријевиќ истакна дека со кандидатот Мартин, Куманово повторно ќе се развива како во годините кога беше предводено од СДСМ – како град пример не само во Североисточниот регион, туку и во целата држава.
„Програмата на Мартин и советничката листа на СДСМ содржи проекти што се реални, остварливи и во интерес на сите граѓани. Вреди да се бориме за нашиот дом. Вреди да се бориме за наше социјалдемократско Куманово“, заврши Димитријевиќ.
