Денеска, 1 септември, ѕвонче одново одекна во училиштата низ цела Македонија, означувајќи го почетокот на новата учебна 2025/2026 година. Радост, возбудa и малку трема се чувствуваа кај најмалите, кои за првпат ја преминаа прагот на училниците.
Екипата на 24 Инфо утрово беше во Основното училиште „Александар Македонски“ во Ново Лисиче, каде што учениците беа пречекани со свечена програма и добредојде од наставниците и директорката на училиштето. Посебно внимание беше посветено на првачињата, кои со насмевки и букети влегоа во училниците, поддржани од своите родители.
Наставниот кадар и локалната самоуправа упатија пораки за успешна и безбедна учебна година, со акцент на квалитетно образование и грижа за секое дете.
