Во хуманитарен натпревар посветен на жртвите и повредените од трагедијата во Кочани, Црвена ѕвезда вечерва во Скопје го победи Вардар со 3:1. Иако резултатот не беше во прв план, двете екипи одиграа ангажирана и квалитетна игра.
Вардар поведе преку Маневски во 28. минута, но до крајот на полувремето „црвено-белите“ направија пресврт со головите на Илиќ и Катаи. Конечниот резултат 1:3 го постави Сремчевиќ во финишот на натпреварот.
На полувремето, на Националната арена „Тодор Проески“, на теренот продефилираа бројни фудбалски легенди од двете екипи – Кочо Димитровски, Ванчо Балески, Ѓоре Јовановски, Зоран Бошковски, Сашо Тодоровски, Вујадин Станојковиќ, Илија Најдоски, Бобан Бабунски, Бошко Ѓуровски, Владимир Петровиќ – Пижон, Драги Канатларовски, Јовица Николиќ, Светислав Караси и Горан Попов.
Целиот приход од натпреварот ќе биде дониран за семејствата на настраданите во трагедијата со пожарот во дискотеката во Кочани.
