Министерот за внатрешни работи Панче Тошковски нема апсолутно никаква контрола врз теренот, речиси секојдневно се случуваат инциденти,убиства, сообраќајќи, потенцираше претседателот на Социјалдемократскиот сојуз на Македонија, Венко Филипче, во вечерашното гостување во „Тема на денот” на телевизија Сител.
„Секојдневно се случуваат инциденти кои ни укажуваат дека министерот за внатрешни работи Тошковски нема апсолутно никаква контрола на теренот. Со цели шаржери се убиваат луѓе по улиците. Сообраќајки со загинати има речиси секоја недела. Секој ден се случуваат инциденти со смртни последици, а министерот е министер за внатрешни работи веќе повеќе од една година, вклучувајќи ја и техничката влада. Сметаме дека несоодветно ја врши работата и ќе го кажеме тоа со аргументи, нема тука политизација”, рече Филипче.
Притоа, Филипче посочи дека, освен трагедијата во Кочани, секојдневните инциденти на улиците и загрозената безбедност на граѓаните се причина поради која СДСМ ќе ја поддржи предложената интерпелација за министерот Тошковски.
Во интервјуто, Филипче нагласи дека од секој аспект државата се наоѓа во многу тешка состојба и, како никогаш досега, се соочува и со економска и со една длабока општествена криза.
„Ако згора на сето тоа го ставиме и катастрофалното водење на истрагата за пожарот во Кочани, би рекол дека и тоа како имаме обврска интензивно да работиме, да ја вратиме довербата на граѓаните”, порача претседателот на СДСМ, Венко Филипче.
