Вишата јавна обвинителка Фатиме Фетаи уште во ноември побарала затворска казна за Васил Јованов, кој според првостепената пресуда доби воспитно-поправна мерка од шест месеци до пет години за продажба на марихуана и кокаин пишува „Фокус“.
Како што дознава „Фокус“, Фетаи била задолжена да го застапува предметот пред Апелација, каде што поднела предлог да се одбие жалбата на Јованов, а да се уважи жалбата на скопското обвинителство кое барало построга кривична санкција.
Во својот предлог, Фетаи нагласила дека казната треба да биде поостра за да се спречат идни кривични дела и да се постигнат целите на казнувањето. Таа навела дека Кривичниот суд правилно ја утврдил фактичката состојба и го прогласил Јованов за виновен, но смета дека санкцијата била премногу блага.
Обвинителката потенцирала дека првостепениот суд ги ценел олеснителните околности – младоста, неосудуваноста и студентскиот статус на Јованов – но ги занемарил отежнителните. Таа истакнала дека обвинетиот покажал манипулативно однесување, не ја признал вината и не покажал искрено каење. Дополнително, во својот предлог Фетаи посочила дека Јованов ја продавал дрогата во станови изнајмени специјално за таа намена, таргетирајќи ја младата популација.
Фетаи дала и негативно мислење за укинување на притворот на Јованов, барајќи да остане зад решетки.
Додека ја чекал одлуката на Апелација на слобода, Јованов на 29 јануари ја прегази 22-годишната студентка Фросина Кулакова на булеварот „Партизански одреди“ во Скопје. Тој возел пијан, без возачка дозвола, со голема брзина и поминал на црвено светло.
Во моментов, Јованов е во притвор во истражниот затвор „Скопје“, а Апелација треба да донесе одлука за неговата жалба во следните неколку дена.
