Ново истражување покажува дека речиси половина од Европејците го сметаат американскиот претседател Доналд Трамп за „непријател на Европа“. Анкетата, спроведена во девет земји-членки на ЕУ, исто така покажува дека мнозинството ја оценува опасноста од војна со Русија како висока, додека повеќе од две третини не веруваат дека нивната земја може да се одбрани во таков конфликт.
Во просек 48% од испитаниците го гледаат Трамп како непријател, најмногу во Белгија (62%) и Франција (57%), а најмалку во Полска (19%) и Хрватска (37%).
Истовремено, довербата во националните воени капацитети е ниска, а 69% сметаат дека нивната земја „не е многу“ или „воопшто не“ способна за одбрана. Анкетата покажува и широка поддршка за членството во ЕУ, со највисока во Португалија (90%) и најниска во Франција (61%), а 63% сметаат дека Брегзит имал негативен ефект врз Велика Британија.
