Европската унија начелно се согласила да санкционира осум лица и субјекти за руската употреба на ирански камикази беспилотни летала во нападите врз Украина, потврдиле тројца европски дипломати, пишува хрватски „Индекс“.
Функционерите на 27-те земји членки на ЕУ денеска треба да договорат конкретен список на санкционирани, за кој треба да гласаат попладнево.
Веста за иранските санкции за беспилотни летала доаѓа откако Америка рече дека испораката на експлозивни дронови од Иран во Русија ги прекршува санкциите на ОН.
Украинските градови, вклучително и Киев, со денови се на удар на беспилотни летала камикази за кои се верува дека се од иранско производство.
САД неодамна соопшти дека се согласува со разузнавачките проценки на Британија и Франција дека испраќањето на беспилотни летала од Иран во Русија ја прекршува резолуцијата 2231 на ОН, која се однесува на ограничувањата за извоз на иранско оружје.