Советот на Европската унија денеска донесе одлука со која целосно се суспендира договорот за визно олеснување меѓу ЕУ и Русија.
Следствено, општите правила на визниот код ќе важат за руските граѓани, се вели во соопштението на Советот на Европската унија.
Ова ќе резултира со зголемување на таксата за аплицирање за виза од 35 на 80 евра, потреба од доставување дополнителни докази, продолжен период на обработка на визите и порестриктивни правила за издавање визи за повеќекратни влезови.
– Договорот за визно олеснување обезбедува привилегиран пристап до ЕУ за граѓаните од доверливи партнери со кои споделуваме заеднички вредности. Со својата неиспровоцирана и неоправдана агресивна војна, вклучително и неселективни напади врз цивили, Русија ја изневери оваа доверба и ги прегази основните вредности на нашата меѓународна заедница. Денешната одлука е директна последица на руските дејствија и дополнителен доказ за нашата непоколеблива посветеност на Украина и нејзиниот народ – се наведува во соопштението.
Се очекува одлуката да биде објавена во „Службен весник“ на 9 септември 2022 година. Ќе стапи на сила со денот на донесувањето, а ќе се применува од 12 септември 2022 година,пренесе Вести.ба.
