Се подготвува системот со кој би се тестирало користењето на дизелот како алтернативно гориво за испорака на топлинска енергија.
Од ЕСМ велат дека употребата на дизелот е резервно решение поради можноста, како последица на геополитичките случувања во Европа, гасот да биде недостапен на пазарот или би достигнал екстремно високи цени.
„Тестирањето ќе се врши по обезбедување на сите соодветни дозволи од надлежните институции и почитување на приписите за постапката“, додава ЕСМ.
Директорот на АД ЕСМ, Васко Ковачевски, претходно деновиве најави дека тестирањето би почнало од 15 ноември за да се проба системот дали ќе може да работи со овој енергенс затоа што во минатото работел на мазут.
„Топлинската енергија во период кога функционира приватната гасна централа ТЕ-ТО од која се добива околу 60 отсто од потребната топлинска енергија за системот во Скопје, останува 40 отсто да се обезбеди од топланите „Исток“ и „Запад“. Токму затоа, заради поволните временски услови, планот на техничките кадри во ЕСМ е да направат тест период во промена на енергенсот. Префрлањето ќе биде во рок од 24 часа, но тоа не значи дека граѓаните ќе останат без топлинска енергија. Тоа ќе се прави прво на едната, а потоа на другата топлана, но при тоа најголем дел ќе се добива од ТЕ-ТО и нема да има прекини во добивањето топлинска енергија“, рече Ковачевски.
ЕСМ денес информираше и дека ја обезбедило потребната количина природен гас за работење на топланите Исток и Запад за периодот до 30 ноември оваа година.
Гасот е обезбен од „Макпетрол“ по цена од 1345 евра за 1000 нм3.
„АД ЕСМ и натаму ќе продолжи да врши набавки на гас за покуси временски периоди со цел да се искористи финансиската поволност од континуираното намалување на цената на гасот на пазарот. Како што и претходно информиравме, топланите ќе продолжат да работат на природен гас во текот на грејната сезона како основен и најеколошки енергенс за нивно функционирање“, велат од ЕСМ.
