Специјалниот пратеник на САД за Западен Балкан, Габриел Ескобар, предупреди на „можни последици“ доколку Црна Гора не ја реши повеќемесечната длабока политичка и институционална криза.
„Црна Гора е во многу длабока криза. Блиску е до институционален колапс каков што речиси никогаш не сум видел во ниту една земја. Влада нема. Две влади паднаа и немаше напредок во формирањето на уште една. Немаат кворум внатре во Уставниот суд, кој би можел да потврди нови избори“, изјави Ескобар во интервју за Гласот на Америка.
„Може да се случи да немаат претседател да им го довери мандатот, да немаат влада да оди напред и Уставниот суд да ги одобри сите одлуки и да ги потврди резултатите од изборите“, нагласи Ескобар.
Американскиот функционер повтори дека главна задача е веднаш да се пополнат испразнетите места во Уставниот суд, „а потоа да се оди на избори“.
„Треба да почнат од Уставниот суд. А освен тоа, веруваме, и анкетите покажуваат дека огромно мнозинство граѓани сакаат нови избори. И оттаму треба да почнат“, смета Ескобар.
Ескобар, повикувајќи се на мислењето на Венецијанската комисија, рече дека секоја идеја дека „Уставот се менува со просто мнозинство“ е многу опасна.
„Веќе кажавме дека не сме сигурни дека тоа би била уставно валидна влада. Не сме сигурни дека би можеле да се потпреме на одлуките на таква влада. Ги охрабривме да не го прават тоа“, заклучи тој.
