За одбележување на првата годишнина од пожарот во дискотеката „Пулс“ Општина Кочани организира тридневна комеморативна и духовна програма: богослужби, отворање на меморијалот „Недовршени соништа – секое име е нечиј свет“, симболична инсталација „63 бели столчиња – 63 животи“ и мурал „Ѕид на сеќавање“. Во 2:15 часот по полноќ, времето кога избувна пожарот, се одржа и собир пред објектот „Пулс“.
Истовремено, во Скопје се одржа „Меѓународна конференција за институционалните и клиничките аспекти и решенија по пожарот во Кочани“, на која говореа лекари и функционери од земјата и странство, кои помогнаа жртвите да бидат згрижени и третирани навремено.
Годишнината од трагедијата остава длабок белег во јавноста: празните столчиња сведочат за животите кои ги загубивме, а сплотената поддршка од локалните заедници и младински организации како Сапорт Кочани испраќа порака на солидарност и надеж.
Вечерва пак, во „Ноќно студио“ ќе се одржи повеќечасовна програма во живо од центарот на Кочани каде ќе зборуваат неколку гости.
