Во силна експлозија во фабрика во Шиловскиот округ на рускиот Рјазански регион вчера загинаа 11 лица, а повредени се 130, објави руското Министерство за вонредни ситуации.
Министерството на каналот Телеграм соопшти дека на местото на несреќата, на околу 320 километри југоисточно од Москва, беа распоредени повеќе од 360 спасувачи и 90 единици опрема, а покрај пожарникарски и спасувачки екипи, на терен се и екипи на психолози од Министерството.
Гувернерот на регионот Рјазан, Павел Малков, вчера изјави дека несреќата е предизвикана од пожар што избувнал во работилница во фабриката.
Причината за пожарот не е прецизирана и не е познато точно што се произведувало во оваа фабрика.
Украинските дронови претходно ја гаѓаа воената и економска инфраструктура во регионот Рјазан, голема рафинерија за нафта и електрана беа погодени од дронови.
Дел од руските медиуми пренесуваат дека експлозијата била предизвикана од палење на барут.
