Останува точно еден месец до почетокот на Светското првенство во фудбал во Катар. Мундијалот ќе почне на 20 ноември со натпреварот меѓу домаќинот и Еквадор.
Ова ќе биде 22. издание на планетарниот шампионат и прво што ќе се одржи во зима, како и прво на кое домаќин ќе биде земја од арапскиот свет. Ова воедно ќе биде последно Светско првенство на кое ќе учествуваат 32 селекции бидејќи, по четири години на завршниот турнир во САД, Канада и во Мексико, ќе учествуваат 48 селекции.
Осум стадиони во Катар ќе бидат домаќини на 64 натпревари од првенството, а сите се опремени со системи за климатизација, кои ќе одржуваат температура од 20-ина степени.
Најискористен објект ќе биде стадионот Lusail Iconic, со капацитет од 80.000 луѓе во Лусаил, кој ќе биде домаќин на десет натпревари вклучувајќи го и финалето на 18 декември.
Воведниот натпревар ќе се одигра на стадионот „Ал Баит“ во Ал Хор.
