По неодамнешното приведување во Македонија поради настап без работна дозвола, Џејла Рамовиќ донесе одлука да го откаже наредниот концерт во Скопје. Таа и нејзиниот бенд биле задржани од надлежните органи поради нерегуларна документација, а проблемите со административните процедури продолжиле и за претстојниот настап.
Пејачката се огласи на Инстаграм, објаснувајќи дека организаторите не успеале навреме да ги обезбедат сите неопходни документи. Таа истакна дека безбедноста на публиката, нејзиниот тим и неа самата е на прво место, поради што била донесена одлука да се избегнат нови потенцијални непријатности.
Во својата објава, Џејла им се заблагодари на фановите за поддршката и разбирањето, додавајќи дека со нетрпение го очекува моментот кога ќе бидат исполнети сите услови за одржување безбеден и успешен концерт. Таа порача дека настапот ќе биде одложен „додека се решат административните работи“.
Последните месеци и други регионални артисти се соочија со слични проблеми. Пејачот Аца Лукас беше приведен поради нерегуларни документи, додека Барбара Бобак била задржана на аеродром и потоа депортирана, што дополнително го актуализира прашањето за административните процедури при настапи во странство.
