Како резултат на полициска потера што се случила утринава околу 0:30 часот во Минхен, загинал 18-годишник кој го покосил автомобил додека чекал трамвај на постојката.
Во него удрил автомобил управуван од 21-годишен маж кој бегал од полицијата.
Според германските медиуми, цивилната патрола на минхенската полиција во областа Кенигсплац го забележала возачот (21) на рено клио како вози со отворен прозорец, пушта гласна музика и ги претекнува полицајците.
Полицајците, кои го следеле со своето цивилно Ауди А4, го запреле реното и сакале да го проверат возачот. Полицајката излегла и тргнала кон автомобилот, а потоа младиот човек забрзал и излетал на главниот пат надвор од градот. На голема раскрсница, 21-годишникот поминал на црвено светло на семафорот, а потоа удрил во автомобил во кој имало тројца сопатници, татко, мајка и дете, кои биле полесно повредени.
Потоа, од силината на ударот, реното било фрлено во трамвајската станица каде стоел несреќниот 18-годишник заедно со уште двајца тинејџери. Тој починал на местото на несреќата, додека другите двајца поминале со повреди, едниот со тешка повреда на ногата, а другиот со полесна повреда на главата.
Возачот на пребрзото возило се здобил со полесни повреди. Тој бил пренесен во болница во Минхен со гребнатинка на лактот и болки во карлицата. Засега не се знае зошто побегнал, но според првичните полициски информации тој немал важечка возачка дозвола, пренесува Билд.
